Tuesday, February 07, 2006

Arangkada for February 8, 2006

 

      SUMABONG PAHOY?

 

Atol sa "Arangkada" sa DYAB Abante Bisaya, nagkauyon silang CPPO Chief Vicente Loot ug kanhi kongresista Celestino Martinez Jr. nga magdungan pagpaubos sa lie-detector test sa NBI aron mahibaw-an kinsa nilay nagsulti sa tinuod ug kinsay namakak. Apan dayong tapos sa tulumanon, nagkauyon sab silang duha nga ang kalihokan way mahimo paghusay sa kontrobersiya sa P9.4 milyones nga tulis sa Land Bank of the Philippines (LBP) sa Bogo, amihanang Sugbo.

Gipasanginlan ni Martinez ang magtiayong Loot uban ni Gobernador Gwen Garcia nga maoy nanggubot sa ikaupat nga distrito pinaagi sa pagamit sa ilang mga katungdanan paguba sa ilang politikanhong mga kaatbang. Apan si Loot nipasalig nga igo lang siyang nagtuman sa iyang gimbuhaton pagsulbad sa krimen ug pagsusi sa gitumbok nga kalambigitan ni Bogo Mayor Celestino Martinez III sa tulis.

-o0o-

Atol sa dul-an sa usa ka takna nilang panagsulti, gisublisubli ni Loot pag-awhag si Martinez nga mouyon nga manglingkod sila aron mopirma silang Loot ug ang iyang asawang si Mayor Maria Luisa Loot og dokumento nga motino nga way bisan kinsa nilang managan pagka kongresista batok sa mga Martinez sa piniliay sunod tuig. Nanghinaot si Loot nga pinaagi sa dokumento di na magduda ang mga Martinez nga namolitika si Loot sa iyang pag-imbestigar sa tulis sa Bogo.

Si Martinez kuwang og bilib ni Loot, kinsa iyang gihulagway nga bugnawng manulti apan lawom og dut. Matod ni Martinez nga, samtang ganahan siyang mohangop sa tanyag sa iyang mga linudhan sa kasal (si Loot nitawag niyag "Ninong"), ang kakuwestiyonable sa pagtumpi sa mga Loot sa dako nilang katigayonan ug ang iyang gidudahang dakong papel ni Koronel Loot paglambigit sa iyang anak nga si Mayor Martinez sa tulis sa niaging tuig ug sa mga rebeldeng komunista sa eleksiyon sa 2001, maoy makapugong niya pagtoo nga may katakos ang magtiayong Loot pagbarug sa ilang mga pung.

-o0o-

Daghan nang nadakpan ug nakiha ang kapolisan sa gidudahang mga tulisan sa LBP-Bogo, si Joel Sumabong maoy labing uwahi. Kahibudngan kay way bisan usa nila nga nakabahin sa dakong kuwarta. Labawng katingalahan nga silang Sumabong ug ang laing sinumbong nga si Dindo Ancero mas naningkamot pagduot sa mga Martinez kay sa pagpanalipod sa ilang kaugalingon.

Si Sumabong gihulagway nga kanhi sakop sa NPA ug lookout sa mga tulisan. Kinsa may nagtudlo niya paghimo og VCD recording, pagpapangunay pag-apod-apod sa daghang kopya ngadto sa labing dagkong mga kahugpongan sa media sa Sugbo, ug nagtago niya gikan sa lapad nga manhunt sa kapolisan? Kon dili si Loot, kay mas lisod man toohan nga gisud siya sa bolsa ni Sumabong, kinsa may laing naa sa posisyon pagamit ni Sumabong ug naay motibo pagusbat sa mga Martinez? [30]  leo_lastimosa@abs-cbn.com

Thursday, February 02, 2006

Arangkada for February 3, 2006

 
     PALUSOT SA MCIAA
 
        Wa pa ba gyod diay motagam ang board of directors sa Mactan Cebu International Airport Authority (MCIAA)?   Napaso na sa ilang pagpamugos nga molingkod sa katungdanan si Angel Verdan isip tagduma sa MCIAA bisan way Civil Executive Service Officer (CESO) tungod lang kay maoy gihatagan og nominasyon ni Pres. Arroyo.   Pero tungod sa pag-insistir sa Civil Service Commission (CSC) nga ilegal ang pagpamugos ni Verdan, napugos ang MCIAA Board pagtulon sa ilang garbo ug pag-awhag ni Verdan sa pagpamutos.

        Nga mahimong mao na say dangatan sa ilang pagsabak-sabak karon ni Heneral Adelberto Yap kinsa, sama ni Verdan, samtang dunay nominasyon gikan sa presidente way CESO eligibility.   Unsa man diay palabihon sa board, ang pagpatigbabaw sa legal ug ligdong nga liderato sa tugpahanan o ang pagsipsip sa presidente ug paglingiw sa balaod aron lang mapahimutang ang iyang mga batabata?

-o0o-

        Ang Civil Service Commission (CSC) nagsusi na sa posibleng kasaypanan nga nahimo ni Commissioner J. Waldemar V. Valmores pagpatigbabaw sa pagtudlo sa MCIAA Board ni Yap.   Dihang ako siyang gitawgan, si CSC 7 Director David Cabanag niangkon nga ang iyang kopya sa Republic Act (RA) 6958, nga may nagtukod sa MCIAA, nagpakita nga lahi ra kaayong Section 7 (b), "To appoint the General Manager of the Authority who shall be the chief executive officer of the Authority;" kay sa gikutlo ni Valmores nga dunay pakapin nga "...upon nomination by the President of the Philippines."

        Nagdumili pa hinuon si Cabanag pagpaneguro hangtod nga makakuha siya og opisyal gyod nga kopya sa RA 6958.   Ang pagpabor ni Valmores kang Yap pinaagi sa suwat ngadtong Transportation Secretary Leandro Mendoza niadtong Oktubre 25, 2005 masubli lang sa tibuok CSC kon may mopasaka og motion for reconsideration suds a 15 ka adlaw.   Pero kon mabisto nga sayop ang balaod nga gipasikaran ni Valmores, di mahitabong mahimong final ang iyang desisyon.

-o0o-

        Ang mga aplikante sa pagka general manager sa MCIAA nagduda nga di inosente ang kasaypanan ni Valmores.   Alang nila lisod toohan nga magyango-yango lang si Valmores sa bisan unsang mga dokumento nga gisumiter ni Yap sa way pagsusi kon unsa gyoy tinuod nga gimbut-an sa balaod.   Giawhag nila ang kadagkoan sa CSC sa pagsusi sa labing daling panahon wa ba magkonsabo silang Yap ug Valmores paglubag sa charter sa MCIAA.

        Usa sa mga aplikante, si Engr. Paul Nigel Villarete, project director sa South Reclamation Project (SRP), dugay nang nangambisyon pagduma sa MCIAA pero wa dayon mangaplay kay wa pay eligibility.   Karong qualified na, nahugno si Villarete pagkahibawo nga gihatagan na hinuon sa CSC ug sa MCIAA Board og mas dakong importansiya ang nominasyon gikan sa presidente kay sa katakos sa mga aplikante.   [30]  leo_lastimosa@abs-cbn.com