Tuesday, January 31, 2006

Arangkada for February 1, 2006

 

       YAP NANGILAD?


Ang kontrobersiyal nga general manager sa Mactan Cebu International Airport Authority (MCIAA), Heneral Adelberto Yap, gipasanginlang nidangop na sa pagpangilad sa Civil Service Commission (CSC) tungod sa iyang nag-alintabong tinguha nga magpabilin sa katungdanan bisan napamatud-an nga wa siya sa gikinahanglan nga career executive officer (CESO) eligibility.

Nagpakabanang mga kawani sa MCIAA nipasangil nga si Yap di lang kay nikumkom kon dili nangahas pa gyod pag-usab sa balaod nga maoy nagtukod sa MCIAA (ang Republic Act 6958) aron lang paghanig sa gihulagway nga "ilegal" niyang paghupot sa dugay nang gikagubtan nga katungdanan pagduma sa labing dakong tugpahanan gawas sa Metro Manila.

-o0o-

Gikuwestiyon sa mga wa malingaw ni Yap ang hukom sa CSC nga nagpatigbabaw sa kasamtangan niyang pagkatudlo sugod niadtong Pebrero 22, 2005. Ang resolusyon gipirmahan lang ni Commissioner J. Waldemar V. Valmores, nga ubos sa mga lagda ang tibuok komisyon man untay mopakanaog sa desisyon sa susamang mga kontrobersiya.

Gilaktawan bang Valmores ang iyang kaubanang mga komisyonado sa iyang pagpabor ni Yap? Ug nganong nisugot ra man sang ubang mga opisyal CSC nga wa sila paapila sa paghukom sa kaso ni Yap?

Labawng kahibudngan mao nga samang CSC maoy nipalagpot ni kanhi general manager Angel Verdan gikan sa MCIAA kay, samang Yap, wa say CESO eligibility. Nganong nilikoy mang CSC sa kaso ni Yap?

-o0o-

Ang tubag mahimong makit-an sa suwat ni Valmores ngadtong Transportation Secretary Leandro Mendoza niadtong Oktubre 25, 2005. Matod ni Valmores sa tanang mga aplikante sa labing taas nga katungdanan sa MCIAA (apil na silang Paul Nigel Villarete, Marcelino Cordova, Ildefonso Lazaro ug Ahmed Cuizon), si Yap ray dunay nominasyon gikan ni Pres. Arroyo.

Nipasabot si Valmores nga ang nominasyon sa presidente maoy "condition sine qua non", di masalikway nga panginahanglan, sa pagtudlo sa MCIAA Board og general manager. Iyang gikutlo ang Section 7(b) sa RA 6958: The MCIAA Board shall "appoint the General Manager of the Authority who shall be the chief executive officer of the Authority upon nomination by the President of the Philippines."

-o0o-

Ang dakong eskandalo mao nga sayop ang probisyon nga gikutlo ni Valmores. Kay ang tinuod nga Section 7(b) sa RA 6958 nagkanayon: "To appoint the General Manager of the Authority who shall be the chief executive officer of the Authority." Period. Wa nay sumpay.

Diin man si Valmores sa iyang gisumpay nga "...upon nomination by the President of the Philippines"? Daghang nagduda nga si Yap ang nihatag sa sayop nga probisyon ngadto sa CSC nga, tungod sa kadaghan sa mga kasong giatiman, o tungod kay si Valmores didto kapustang Yap, wa na lang magtagad pagbasa sa tinuod nga probisyon sa balaod. [30]  leo_lastimosa@abs-cbn.com